DEN HAAG – Polis na Hulanda  a detené un hòmber di 34 aña, prosedente di Steenbergen, ku ta sospechoso den kaso di asesinato djadumingu último riba DJ Siki Martina. A deten’é na Barendrecht.

Alrededor di mitar di djes a tira riba e Yu di Kòrsou di 31 aña na stashon di metro na Coolhaven, Rotterdam.  E asesino a hui bai den un outo koló skur. Segun polis e imágennan di kámara ta mustra ku tin  por lo ménos un persona mas enbolbí den e tiroteo. No a enkontrá e persona aki ainda.

Inmediatamente despues di e insidente tim di reshèrshi a sali en buska di e outo koló skur. Polis ta informá ku djaluna nan a haña yamada di un siudadano atento ku a mira un outo pará na Rotterdam-Ommoord ku perforashon di bala i a resultá ku ta e outo ku polis ta buskando. A tuma e outo den beslag i ta investigando e kaso.