KRALENDIJK- Segun sifranan di e Kuerop Polisial di Karibe Hulandes (KPCN) e temporada tras di lomba a konstatá ku den mayoria kaso shofùrnan bou di influensia di alkohòl ta kousa aksidente.  

Konsumo di alkohòl ta baha bo abilidat pa reakshoná, dor di kua bo por reakshoná ménos lihé i asina ta pone tantu bo mes komo otro partisipante den tráfiko den peliger. For di sifranan di polis di e dos siman nan tras di lomba a resultá ku den 12 kaso konsumo di alkohòl a hunga un ròl. Esaki ta motibu pa intensivá kòntròl di riba konsumo di alkohòl den tráfiko e periodo benidero.

But

‘’Bo ta manehá bou d influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kontrol rutinario’’, asina bosero di KPCN ta laga sa.