AMSTERDAM – Polis a detené un di seis sospechoso ku probablemente tabata enbolbí den e intento di asesinato riba Peter R. de Vries. Ta trata di un Hulandes prosedente di Kòrsou di 27 aña, ku nan a detené den su kas na Helmond.

Segun Ministerio Públiko e hòmber tabata probablemente den un banda, ku tabata usa violensia pisá kontra pago riba petishon di un òf mas kliente. E ta detené ku restrikshon, loke ta nifiká ku e por tin kontakto solamente ku su abogado.

Ministerio Públiko ta informá tambe ku e sospechoso di 26 aña ku nan a trese for di Spaña dos siman pasá, lo mester keda detené sigur pa nobenta dia mas. Anteriormente a prolongá tambe e detenshon preliminar di un hòmber di 27 aña ku a detené na Kòrsou ku e mésun periodo.

Ámbos sospechoso tin e nashonalidat Hulandes. Tambe a detené un Polako di 27 aña, ku lo a guia e asesinato. Segun fuentenan tres di e sospechosonan enbolbí den e asesinato di Peter R. de Vries ta prosedente di Kòrsou.