ORANJESTAD – Na yüni a sentensiá un mama Rubiano na un kastigu di 4 aña di prison pa abusu seksual kontra su dos yunan. Esei a sosodé entre 2011 i 2017. E muchanan no tabatin ni djes aña ainda ora ku e abusu a kuminsá. Ayera a publiká e sentensia.

E sentensia pa gran parti ta basá riba deklarashonnan di e dos muchanan. Segun e abogado di e mama esakinan ta inkonfiabel, pasobra riba sierto puntonan nan ta desviá di otro.

Pero wes no ta di akuerdo ku esei. Ámbos deklarashon ta koinsidí ku otro pa loke ta trata e senario i e manera di aktua di e mama. Ademas e emoshon ku a konstatá serka e muchanan ora nan tabata konta di e abusu seksual ta kontribuí na e konfiabilidat di e deklarashonnan di e muchanan.

Fòrsá

E abusu seksual a tuma lugá den kas di e mama i e muchanan, un lugá kaminda e víktimanan partikularmente mester a sinti nan seif den  kompania di netamente nan mama, Korte ta bisa. E sospechoso a fòrsa e víktimanan pa hasi aktonan seksual i ku su aktuashon e tabatin solamente atenshon pa satisfakshon di su propio nesesidatnan seksual i no a tene kuenta ku sentimentunan di e víktimanan, ku pa kolmo ta su propio yunan. Aktuando asina e sospechoso a violá riba un manera brutal integridat físiko i mental di e víktimanan hóben, segun e wes.

Na ora di sentensia Korte a wak tambe e rapòrt sikológiko. Eiden a konstatá ku e mama tin kapasidat intelektual retardá, pero ku no tin indikashon di un desòrden di personalidat òf desaroyo.

E sospechoso ta mira e diferensia entre bon i malu i por inkalkulá konsekuensia di su propio aktuashon. E sikólogo ta konsiderá e sospechoso kompletamente responsabel pa su aktonan. Ta kalkulá e chèns riba residivismo, sin  tratamentu i guia, leve.