ORANJESTAD – Wes Merikano ta ordená pa konfiská un avion Airbus 319 ku ta registrá na Aruba. E avion ta di e komersiante Rusiano i miembro di parlamento Andrei Skoch.

Segun outoridatnan di Estados Unido e Airbus A319-100 tin un balor di mas ku 90 mion dolar. E konfiskashon ta sigui despues ku a violá e sankshonnan Merikano pa e invashon di Rusia na Ukraina. Aparentemente e avion ta na Kazachstan.

Djaluna un wes federal a aprobá un orden di konfiskashon. Outoridatnan Merikano ta di opinion ku Skoch a violá sankshonnan Merikano, usando dòler Merikano pa paga outoridatnan di Aruba derechonan di registrashon di e avion. Tambe lo a paga primanan di seguro via institutonan finansiero Merikano.

A hasi e mas ku 113.000 dòler na pagonan di registrashon  i e 285.000 dòler na primanan di seguro via bankonan Merikano, pero no tabatin pèrmit pa esei.

E órden di konfiskashon ta menshoná ku banda di e avion, Skoch tin tambe un yate bou di nòmber Madame Gu, un helikòpter i un vila den Four Seasons Hotel na Seychelle. Riba e bienesnan aki no por pone beslag.