ORANJESTAD – Servisio di impuesto na Aruba a generá den e promé mitar di e aña aki 469 mion florin na entrada via instansianan di gobièrnu. Esei ta kasi un kuart mas ku aña pasá.

Ta trata di entradanan manera impuesto di turista, primanan di penshun di behes AOV/AWW i primanan di seguro médiko AZV. Tambe a konta e entradanan di èrfpagt i petishonnan pa pèrmit aden.

A registrá e entradanan den e promé mitar di aña di  Aruba Tourism Authority ATA, Banko di Seguro Sosial SVB, Seguro médiko General AZV, Gerensia di Informashon i Planifikashon i e outoridat pa duna pèrmit Dimas.

Si kompará ku den e promé mitar di aña pasá a drenta 378 mion florin, e aña aki ta un oumento di 24 porshento. 

SVB ta esun ku a generá mas entrada. Den e promé lunana di 2022 el a produsí 159 mion florin i esei tabata 142 mion florin den 2021. Despues ta sigui AZV ku 132 mion florin, un subida di 14 mion florin kompará ku 2021.

E impuesto di turista di ATA a produsí e aña aki 51 mion florin. Aña pasá esei tabata mas ku mitar ménos: 23 mion florin. Na derecho di èrfpagt a drenta e aña aki djessinku mion florin. Aña pasá a paga djesdos mion florin. E fondo di turismo TPEF a produsí dos mion florin. Aña pasá esei tabata un mion florin. Dimas a generá 400.000 florin, kompará ku solamente 80.000 florin aña pasá.

Segun Servisio di Impuesto e resultadonan haltu aki ta konsekuensia di e maneho ku ta dirigí riba kumplimentu.