ORANJESTAD –  JetBlue Airways ta saka 37 ruta for di su sistema den un intento pa garantisá konfiabilidat operashonal riba e sobrá rutanan. Despues di a adaptá e programashon kaba pa e temporada drùk di verano, e kompania ta sigui adaptá e programashon pa prepará su mes mihó riba hèrfst i invierno.

A introdusí hopi suspenshon kaba i awor a prolongá nan. E desishon a bini despues ku JetBlue a skrap òf suspendé kaba mas ku binti ruta pa  verano.

Segun FlightAware riba djadumingu 3 di aprel e kompania mester a anulá 33 porshento di su buelonan i riba dje 35 porshento di su buelonan tabatin retraso.

E problemanan a sigui kontinuá ora ku djasabra 9 di aprel JetBlue a anulá 18 porshento di su buelonan,  lokual ta 191 buelo total i 48 porshento di e buelonan tabatin retraso.

Djadumingu 10 di aprel a anulá djestres porshento di e buelonan (146) i 37 porshento di e buelonan (407 na tur) tabatin retraso. JetBlue no ke sigui asina mas. Gran parti di e problemanan, segun e kompania, ta fuera di su influensia, manera problema ku kòntròl di tráfiko aéreo  na diferente aeropuerto.

Islanan den Karibe

Pa e islanan Hulandes den Karibe ta trata buelonan for di Newark i Fort Lauderdale pa Aruba i Sint Maarten. E kompania ta keda bula diariamente pa Aruba for di JFK New York i Boston. E konekshon entre JFK New York i Sint Maarten tambe ta keda.

JetBlue no ta e úniko kompania di aviashon ku ta eliminá rutanan, adelantando riba e temporada di hèrfst i invierno. American Airlines tambe a konfirmá na kuminsamentu di ougùstùs ku den sèptèmber i òktober e lo skrap miles di buelo pa redusí eventual interupshon di buelo te na un mínimo, kaminda e Philadelphia-hub lo haña e sla mas duru.