A arestá promé persona relashoná ku tèst di PCR falsu na aeropuerto

KRALENDIJK- Riba djárason, 6 di òktober 2021, Koninklijke Marechaussee (KMar) na Boneiru a detené un dama di 42 aña di edat, riba sospecho di falsifikashon di dokumento i/òf estafa.

Ta sospechá e dama di ta responsabel pa otorgá varios tèst komersial di Covid falsifiká na personanan ku a laga hasi e tèst promé ku nan buelo pa Estados Unidos (Merka). Ta trata aki di tantu tèst antígeno komo tèst di PCR.

Riba djasabra 2 di òktober na momentu ku e biaheronan a bai entregá nan resultado di  tèst pa por chèk in pa nan buelo, a surgi duda tokante outentisidat di e dokumentonan. Mesora a sali na kla ku e instansia ku lo mester a otorgá e resultadonan di tèst – di kua su nòmber ta pará bou di e dokumentonan – no tabata konosé e grupo di biahero i ningun momentu no a otorgá un resultado di tèst. Riba esaki a hala atenshon di Marechaussee.

Investigashon

KMar a kuminsá un investigashon i ta traha den koperashon estrecho ku Korps Politie Caribisch Nederland (KPCN) i e departamentu di Salubridat Públiko di Entidat Públiko Boneiru (OLB). Den esaki a detené un sospechoso ku ya ta enkarselá.

E sospechoso a base di su funshon tabata enbolbí ku tèstnan komersial di PCR i esnan antígeno. For di investigashon mas aleu mester bin sali na kla si ela hasi mal uso di su posishon pa falsifiká e tèstnan. KMar ta investigá tambe si tin insidentenan anterior kaminda e sospechoso a hasi su mes kulpabel.