CARACAS – Despues di a korigí un mal funshonamentu e kompania di estado Venezolano PDVSA a bolbe reanudá produkshon di un di e refinerianan mas grandi di e pais. Esaki e ofisina di prensa Reuters ta anunsiá.

E reformadó di NAFTA di e refineria Cardon,  ku un kapasidat di 45.000 barí di zeta pa dia, ta produsí komponentenan di un nivel haltu di octan pa gasolin ku ta esensial pa provishon di gasolin pa e pais.

E reformadó a para e produkshon fin di luna di yüni pa hasi mantenshon ku a dura mas largu ku e 21 dia ku a planiá originalmente.

E refineria di Amuay i Cardon huntu ta forma e sentro di refineria den e parti oksidental di Falcon,  ku un kapasidat di produkshon kombiná di 955.000 barí pa dia. Den e último añanan sinembargo e kompleho a hañ’é konfrontá na vários okashon ku paro di e produkshon. Segun oposishon na Venezuela esaki ta a konsekuensia di mal maneho i falta di  mantenshon 

E refineria El Palito na e parti sentral di e kosta di e pais, ku ta e refineria mas chikitu, na fin di 2021 a stòp ku produkshon di gasolin.

Na luna di mei a anunsiá un akuerdo entre e kompania di estado Irani National Iranian Oil Engineering and Construction Company i Venezuela pa drecha e refineria.