KRALENDIJK – Djaweps 26 di òktober a detené na Aeropuerto Internashonal di Boneiru dos hòmber Italiano di 41 i 60 aña riba sospecho di labamentu di plaka. Durante kontrol a deskubrí un montante di plaka di kasi 30.000 dòler, prosedente di benta di oloshi barata pa preisnan mas haltu. Mientrastantu e hòmbernan a bandoná  e isla.

E detenshon a tuma lugá despues di un notifikashon di Kuerpo di Polis di Karibe Hulandes (KPCN), ku a risibí informashon tokante e duo ku tabata bende oloshi i perfume riba kaya. Despues ku Koninklijke Marechaussee i Duana di Karibe Hulandes a listra nan i inspektá nan ekipahe i paña a deskubrí e montante di sèn sospechoso. E sospechosonan no por a bisa di unda e sèn ta bini. Konsekuentemente a konfiská e sèn i e hòmbernan mester a bandoná Boneiru. 

E detenshon tabata resultado di un koperashon efektivo entre diferente servisionan di seguridat, entre kua Ministerio Públiko, KPCN, Duana di Karibe Hulandes i Koninklijke Marechaussee. E servisio ta dedikando mas i mas riba Akshon Dirigí pa Informashon/Trabou di Polis (IGO/IGP), un strategia ku ta dunando su frutanan.