WILLEMSTAD – Ayera a detené dos hòmber den un kas na Montaña Abou Bieu mientras nan tabata kitando kabelnan di koper. E detenshon a sosodé despues di un tep. Ora e patruya di polis a yega na e sitio, nan a topa ku e ladronisia di kabel i a deskubrí ku un kantidat grandi di kabel a keda intakto ainda.

Esaki a kondusí na aresto di dos sospechoso, ku a detené pa ladronisia i skondementu di  artíkulonan hòrtá. E detenshonnan a tuma lugá den un kas na Kaya Duvert “Boy” Nicolina. Na e sitio korespondiente a bin topa mas kabel ku tabata prosedente di kabelnan hòrtá di kompanianan di koriente i internet.

Un aspekto notabel tabata ku un di e sospechosonan tabatin un t-shirt bistí ku e logo di un kontratista. E bosero di polis a duna di konosé ku mas investigashon mester demostrá si e persona aki realmente ta traha pa e kontratista.

E ladronisia di kabel a kondusí e último simannan na problemanan serio, kaminda barionan kompleto tabata sin koriente. Esaki a kondusí na un koperashon entre polis i e instanshanan afektá manera Aqualectra, Flow i Digicel pa atendé ku e ladronisianan aki.