ROTTERDAM – Polis di Rotterdam a detené djamars un hende muhé di 26 aña en konekshon ku e morto misterioso di Mike Venema. A haña su kurpa riba 5 di yüli 2019 den un pikòp riba fondo di laman Karibe serka di Kòrsou.

Mike Venema, un paipfeter i tékniko-dj, a disparse 12 di sèptèmber 2018. Promé ku su desaparishon e tabata biba den un apartamentu na Anasaweg, pero tambe el a keda algun tempu na resort Jan Sofat. Finalmente un sambuyadó a deskubrí su kurpa na Shut, un sitio aislá na kosta nort di Kòrsou. Polis ta sospechá ku Venema a bira víktima di un krímen.

E lugá di e krímen, Shut, ta konosí komo un área aislá ku ta propiedat di aeropuerto i pa basta tempu kaba ta será. “E ta un sitio kaminda personanan por atendé asuntunan sin ku bo ta mira nan,” segun un bosero di polis. A haña Venema su pikop, un Ford Raptor, einan ku su restonan mortal aden.

Despues di un investigashon profundo den kolaborashon ku outoridatnan di Kòrsou, polis a detené un hende muhé di 26 aña na Rotterdam. Ta sospechá e hende muhé di komplisidat den morto di Venema. E investigashon ta andando ainda i no ta ekskluí mas detenshon.

Den programanan di detekshon manera Team West i Opsporing Verzocht i via medionan sosial polis a pidi atenshon kontinuamente pa e kaso aki. Peter R. de Vries Foundation tambe a kontribuí na e publisidat i a pone un rekompensa di 100.000 euro. E esfuersonan aki a kondusí na diferente tep ku a yuda e investigashon avansá.

Mayornan di Mike Venema a biba hopi aña den insertidumbre tokante destino di nan yu. Desafortunadamente su mayornan a muri aña pasá sin haña kontestanan ku nan a anhelá tantu. Venema, ku a nase i lanta na Heemskerk, a move na aña 2009 pa Korsou. E tabata traha komo paipfeter i durante fiestanan e tabata asistí dj-nan. Tambe e tabata manehá apartamentunan, kaminda e tabatin mantenshon bou di su enkargo.