KRALENDIJK – Kuater boneriano a risibí e ‘Sambarku di estímulo’ pa nan aporte balioso na nos kultura lokal. Ta trata di Tariq Thielman, Rogen Pineda, Izaïn Mercera i Jumira Goeloe. Den presensia di miembronan di famia, amigunan, representantenan di SKAL i miembronan di Komishon Herensia Kultural Rincon, diputado Nina den Heyer a entregá e ‘Sambarku di estímulo’ na e kuater personanan akí. 

E entrega a tuma lugá riba djaweps 16 di mei 2024 na Plasa Commerce na Rincon. Durante e anochi akí tur atenshon tabata dirigí riba e kuater suidadanonan. SKAL ta felisitá e nominadonan di ‘Sambarku di estímulo’ i ta spera ku nan ta un bon ehèmpel ku ta iluminá e kaminda pa otronan sigui.

Na edat hóben kaba Tariq Thielman a kuminsa toka músika. El a toka den vários grupo di músika krioyo, manera Foyan Boys, Kunuku Boys, ESO i JC and Friends. Thielman ta toka entre otro kuarta i wiri.

Rogen Pineda ta toka diferente instrumènt i e tin un pashon pa skirbimentu di kuenta i aktuashon. Pineda tabata direktor i produktor di e pelíkula lokal ‘Mohada’. El a produsí e pelíkula ‘Mamadu’ tambe, ku ainda tin ku estrená.

Izaïn Mercera ta konosí serka e públiko grandi komo e kara di ‘Nos Zjilea’, e evento kultural ku nan ta tene riba e último djasabra di luna na Mangazina di Rei. E ta responsabel tambe pa diferente proyekto edukativo na Mangazina di Rei.

Pa vários dékada kaba Jumira Goeloe ta okupá su mes ku baile folklóriko. Riba djasabra Goeloe ta duna lès di baile folklóriko na Mangazina di Rei. E ta forma parti di Komishon Herensia Kultural Rincon tambe.

Si bo tambe ke proponé un hende pa bini na remarke pa ‘Sambarku di estímulo’ pa aña 2025, e ora ei tuma kontakto ku SKAL via [email protected].