WILLEMSTAD – Korte a sentensiá D. Gabriel di 45 aña na un kastigu di prizòn di 12 luna pa poseshon di arma. Segun e veredikto Gabriel ta responsabel pa e arma ku polis a haña den e kas kaminda e ta biba, despues ku a topa e arma riba su pasaporte den su kash’i  paña.

Durante un entrada dia 17 di yüli na Kaya Aura Winkel polis a haña un arma den e kamber di drumi di e sospechoso. Gabriel a nenga tur embolbimentu ku e arma i a deklará ku e no sa kon e arma a yega einan. 

E kaso a kuminsá lora durante e investigashon den e kaso di asesinato Hummer (e asesinato riba Boechi), ora ku polis a skucha un kòmbersashon telefóniko entre e sospechoso den e kaso di Boechi, Christopher Zimmerman, i un deskonosí. Zimmerman a bisa: “Ruman, kiko ta pasando, e hòmbernan ta komportá nan mes manera homo, pero ora nan haña nan den problema, nan ke yora. ‘Nò, mi ruman, mi ta hasi asina hopi pa nan i nan ta tene tur kos.’ P’esei mi ke pa bo dunami e kos.”

E deskonosí ta kontestá: “Mi ke dunab’é, pero mi no ke keda sin dje tampoko.” Investigashon mas aleu a mustra ku e deskonosí tabata Gabriel.

Polis a deskubrí ku anteriormente partner di Gabriel a hasi denunsia kontra dje pa menasa. Durante un interogashon su partner a atmití ku Gabriel a fia un arma di un amigu.

Despues di e revelashon aki polis a revisá e kas di Gabriel na Kaya Aura Winkel i a haña e arma den un kash’i paña riba un di su pasaportenan.

Durante e proseso wes a puntra Gabriel tokante e kòmbersashon ku Zimmerman, kaminda Gabriel a kontestá ku tabata trata di sèn. Gabriel a deklará sinembargo anteriormente na polis ku Zimmerman a pidi’é pa bende un arma p’e.

Gabriel a nenga esaki i a bisa ku nan tabata papia di un outo i despues di sèn. Polis ta sospechá ku probablemente Gabriel a fia Zimmerman un arma pa asesiná Boechi òf e tabata na altura di e plannan.

Na aña 2015 a sentensiá Gabriel kaba na sinku aña di prizòn pa poseshon di arma i el a kaba di sali liber.

Gabriel a keda nenga di tin algu di haber ku e arma. El a deklará ku despues ku el a sali liber su ruman hòmber a bin busk’é i el a bai biba serka dje, no den e kas kaminda a haña e arma. El a atmití ku ratu ratu e sa bai keda einan, pero e kas no ta di dje. Segun Gabriel hopi hende ta bishitá e kas i no por a ten’é responsabel pa e arma.

Un tanta di Gabriel, ku a deklará ku e sa hasi e kas limpi debesenkuando, a konfirmá ku e kas ta será pa años kaba i ku ningun otro hende sa drent’é.

Fiskal a konsiderá e akusashon pruebá a base di e arma ku a haña riba un pasaporte den e kamber di drumi di e sospechoso. E wes no ta mira motibu pa desviá di e eksigensia di fiskal i ta konsiderá Gabriel responsabel pa e arma.