KRALENDIJK- Riba djarason a tuma lugá apertura suave di e vèlt kaminda ta praktiká e deporte di beisbòl. Aktualmente e vèlt tin e nòmber Amas, i awe diputado di deporte James Kroon, a publiká e nòmber ku e vèlt ta bai karga pronto. Diputado Kroon a bisa, momentu ku e vèlt ta kla, e ta haña su nòmber nobo, Juanita Egdwina Josephia, bon konosí pa Dudi. 

Roy Vink di KNBBB a papia na e okashon i a ekspresá kon kontentu e ta ku e trabounan pa e vèlt nobo ku yerba artifisial. “E vèlt ta kasi kla pa otro siman, kuminsá ku e weganan di Serie Del Caribe. Pabien i apesar ku e vèlt no ta kompletamente kla. Ta importante pa mas hende posibel ta aktivo ku deporte. Hopi hende a hinka skouder pa a logra esaki. Ta importante pa hasi bon usa di e vèlt i kuid’e.” 

Diputado di deporte James Kroon tambe a mustra su mes kontentu. “Awe ta algu históriko, e motibu ku nos ta aki na e vèlt Amas. Mi ta felisitá bario Tera Kòrá, ku a kuminsá ku futbòl, sòftbòl i despues vèlt Amas.

Nòmber

Diputado Kroon a splika tambe ku na momentu e vèlt ta kompletamente kla, durante e apertura e vèlt ta haña su nòmber nobo, Juanita Egdwina Josephia. “Nos tur konosé komo Dudi. E meta ta pa e mama i tata por hasi uso di e área ku ta bai keda krea na e sitio, pa praktiká deporte.