A hasi miles di Hulandes katibu na Nort di Afrika: Historia skondí ta revelá

ROTTERDAM – A deskubrí resientemente un kapítulo relativamente deskonosí di historia Hulandes den e buki Drie keer verkocht in een vreemd land di e historiadó Leendert J. Joosse. Entre 1600 i 1800 a hasi miles di Hulandes katibu den diferente parti di Nort di Afrika.  Apenas un kinta parti di nan a regresá, apesar di esfuersonan familiar i di gobièrnunan lokal pa kumpra nan bèk, Historiek, un revista di historia Hulandes ònlain ta relatá.

Un tragedia a afektá prinsipalmente marineronan ku a partisipá na e ‘Straatvaart’ – e ruta di portanan marítimo Hulandes pa e área marítimo Mediteranio via di Pasashi di Gibraltar. E notorio piratanan Berberisko di Nort di Afrika a asaltá masoménos binti porshento di e barkunan ku a tuma e ruta aki.  Nan a kué e personanan na bordo prezu i bende nan riba merkadonan na Marokko, Algiers, Tunis óf Tripoli komo katibu. Hopi di nan no a reuní bèk nunka mas ku nan famia òf bai nan kas bèk.

E magnitut di e tragedia aki ta sali na kla for di e sifranan. Entre 1600 i 1620 a sekuestrá 22 di e 124 barkunan ku a sali for di Amsterdam. Den e mésun periodo 41 di e 340 barkunan ku a sali for di West-Friesland a bira víktima di e piratanan. 

E storianan doloroso di e víktimanan a yega nan kas, kaminda nan tabata sklama pa ayudo. Famianan tabata spera riba ayudo di gobièrnu pa liberá nan sernan kerí. Na Friesland i Zeeland e Estadonan na parti wèst tabata organisá ayudo efektivo, mientras ku na Zuid-Holland wes-, propietarionan di barku i empresarionan tabata tene kolekta pa kumpra libertat di e katibunan. Na Noord-Holland i West-Friesland tabata organisá kolekta den koperashon ku e atministradónan di bario.

E resultado tabata sinembargo desepsionante. Finalmente por a reskatá solamente un kinta parti di e katibunan. Hopi tabata obligá di kombertí pa islam, mientras otronan, spesialmente hóbennan, a muri den sklabitut.

E storia di e Hulandesnan ku nan a hasi katibu na Nort di Afrika ta un parti importante pero no sufisiente konosí di historia Hulandes. Drie keer verkocht in een vreemd land ta trese e kapítulo, ku a lubidá aki, den publisidat i ta tira lus riba e esfuersonan baliente di nan famianan pa haña nan bèk. E buki di Joosse ta duna un bista impreshonante di un tempu ku Straatvaart tabata yen di peliger i berans, i ku e piratanan Berberisko a influensiá miles di bida na un manera trágiko.