Notisia

A instalá Komishon di konseho tokante Keho pa Kuido i Hubentut Hulanda Karibense (ZJCN)

KRALENDIJK- Entrante promé di novèmber 2022 a instalá un Komishon di konseho tokante keho independiente i eksterno, pa duna konseho riba evaluashon di kehonan di habitantenan di Hulanda Karibense relashoná ku kuido òf kuido di hubentut. 

Segun un relato di prensa, Kuido i Hubentut Hulanda Karibense (ZJCN) di ministerio di VWS  ta konsiderá importante ku ta atendé keho di habitantenan kontra ZJCN di forma kouteloso. E aktual funshonario di keho di ZJCN ta atendé tur keho ku drenta. E funshonario di keho ta wak si bo keho ta atmisibel i lo tuma e keho komo tal den tratamentu. 

Entrante promé di novèmber lo hasi un agregashon importante na e prosedura di keho eksistente. Den algun kaso por pidi e komishon di konseho tokante keho independiente pa duna konseho riba evaluashon di un keho. 

Pekuliar

Pekuliar na e komishon nobo ta ku niun hende no por entregá un keho riba su mes na e komishon. Ta solamente ora e direktor di ZJCN ta di opinión ku tin motibu pa un evaluashon eksterno, e mes lo pidi e komishon un konseho.  Esei ta trese kuné e pregunta si e komishon ta independiente i kiko lo pasa ora ku tin un keho serio, ku por ehèmper ta regardá e direktor mes, òf un kaso ku direktor no ta haña algu serio, pero otronan si ta haña esaki serio. 

Miembronan

A nombra komo miembro den e Komishon: Presidente Frits Goedgedrag (anterior gobernador di Antias Hulandes), presidente athunto D.C. Kramp, miembronan Astrid McKenzie-Tatem, Pierre Perigault Monte i M. Molenaar.

ZJCN ta enfatisá ku ningun di e miembronan di komishon no ta empleá na ZJCN. E nombramentunan ta pa un periodo di kuater aña, ku e posibilidat pa prolongá e periodo aki dos biaha. 

Deel dit artikel
Rocargo
Rocargo
Rocargo
Rocargo