A reuní tokante futuru di turismo krusero na Boneiru

Kralendijk – Siman pasá djaluna 16 di ougùstùs, diputado Hennyson Thielman tabatin un enkuentro fruktífero ku e Bonaire Cruise Tourism Association (BCTA). Intenshon di e enkuentro tabata pa kompartí diferente punto importante ku otro pa mehorashon di e sektor.

Resientemente gobièrnu di Boneiru a komuniká e vishon pa sektor di turismo krusero ku a keda dileñá den e plan di rekuperashon di turismo. E plan ta asentuá kambionan pa mehorashon di nos maneho di turismo krusero i pa atraé bishitante na un forma mas stratégiko. En konekshon ku esaki diputado Hennyson Thielman na diferente okashon a sinta ku BCTA ku tin un meta komun; bienestar di e sektor. Huntu a papia tokante diferente punto ku por reforsá pa traha riba mehorashon i stabilidat di e sektor.

Algun resultado di e ekuentronan ta entre otro pa inisiá ku un grupo di trabou pa por yega na stabilidat duradero pa e kompanianan di taksi i tur ku ta trahando direktamente i indirektamente ku e industria krusero. Tambe lo sigui dialogá ku BCTA riba kon por yuda intermediá huntu ku ofisina di haf i TCB pa bini ku liñanan krusero mas atraktivo i mihó pa Boneiru.

Huntu lo intermediá i interkambiá di pensamentu ku TCB i ofisina di haf pa loke ta trata tur informashon di desaroyo pa Boneiru. BCTA a pone su mes disponibel pa yuda ku diferente plan manera por ehèmpel un plan di ehekushon pa yuda empresarionan lokal hasi negoshi den sektor krusero, maneho di akuerdo di data i formanan mas efektivo pa uza e kanal aki pa tuma desishon, plan di akshon pa aglomerashon i maneho di e área krusero.

Diputado Thielman ta kontentu di por a sinta na mesa ku BCTA pa asina komprondé di aserka kon por traha huntu pa logra resultadonan konkreto pa e industria. Lo sigui reuní den forma kontinuo pa asina sigurá ku ta atendé ku e prekupashonnan ku tin i bini ku akshonnan ku ta enfoká riba un maneho efisiente di e industria krusero.

---

Lesa tambe:

• 
  Enkuesta: Kompetensia inhustu pa kompanianan lokal na Boneiru?
• 
  Sobrekargo di siguridat lo hasi pasashi for di Kòrsou un tiki mas karu atrobe 
• 
  TCB ta wak bèk riba eksitoso konferensia di turismo
• 
  Aeropuerto Flamingo no ta satisfecho ku sistema nobo pa entregá maleta
• 
  A renombrá Representante di Reino interino pa Boneiru, Sint Eustatius i Saba