KRALENDIJK – Djabièrnè a selebrá e di 100 aña Sociedat San Antonio de Padua na Rincon. A kuminsá ku palabra di Señor, esaki despues ku Bubui Cicilia a kòrta sinta di e edifisio nobo. Tabatin hopi hende presente, pa e okashon spesial. Marcelino Chonky De Lannoy a pèrkurá pa e palabra di Señor i bendishoná e edifisio ku awa bendita.  

Bubui Cecilia a bisa ku e direktiva di 100 aña Sociedat San Antonio de Padua, ta esun di mas bieu na Boneiru. El a papia di e proseso pa por a yega na e edifisio nobo ku tin awor. James Kroon a yuda bon ku e idea di e proyekto na kuminsamentu. E gobièrnu aktual tambe mester a aportá i nan a hasié. Meskos direktor di BOG Adely Susana-Jansen tambe. Por hasi uso di e sala pa diferente kos i no solamente pa momentu di entiero.

Gezaghèber John Soliana tambe a hiba palabra na e okashon, i a papia di e importansia di koperativismo na Boneiru, ku tin biaha ta parse di bai pèrdi. “Laga sosiedat Antonio de Padua ta un inspirashon pa nos restablese e solidaridat nesesario pa nos krea strukturanan ku ta hasi kosto di bida mas pagabel pero tambe fortifiká e fibranan sosial di nos komunidat”, asina Soliano a bisa.