KRALENDIJK, – Art Culture Education (ACE) Foundation ta hopi kontentu di anunsia un proyekto nobo ku ta hiba di nomber “CAREER”. E intenshon di e proyekto aki ta pa yuda 5 hoben talentoso pa hasi nan soño pa bira un kantante i kuminsa un karera realidat. 

E proyekto ta wòrdu finansiá dor di Fonds Podium Kunsten Hulanda i a ser diseñá pa yuda hóbennan ku ta aspirá pa bira artista lokal, i posibelmente logra internashonalmente. 

E proyekto Career ta duna kada artista training den e siguiente areanan: Kanto, skibi, guia riba kon pa krea bo mes estilo di bisti, bo imagen riba esenario (paña, sapatu, kabei). Nan lo siña tambe e aspektonan importante den un karera artistiko manera merkadeo i maneho. E proyekto aki ta habri pa hobennan entre 18 pa 31 aña ku tin intenshonnan serio den konstrui un karera komo kantante.

Tata ku yu

E proyekto aki lo wòrdu kargá dor di dos artista grandi Boneriano, Tata i Yu. Tur dos tin logronan grandi artistikamente tras di lomba. Ta trata aki di Xemio i Xechell Jacobs. Dos generashon diferente ku lo bai komparti nan konosementu ku esnan ku ke logra. Huntu nan lo bai duna e hobennan aki un training intensivo i benifisiante pa kada partisipante.