Kralendijk- E kompania Addo’s Book Toys and Gifts, ku tabata bende entre otro buki, koi hunga, pero tambe hopi produkto pa ofisina, ta bai sera su portanan.

Esaki doño di e kompania ku na tur a eksistí 12 aña i mei, Addo Stuur, a komuniká. Segun Stuur, su ousensia, pero tambe a ‘lockdown’ di algun siman, a kaba di kompliká situashon delikado di e kompania.

Addo’s a kuminsá den Kaya Grandi, bou di edifisio konosí komo ‘E Wowo’ pero despues a muda pa e mini-mall na Kaya Industria. Segun Stuur, den e tempu ei, esei tabata mas barata ku e lokalidat den Kaya Grandi. Ademas, segun Stuur a bisa e tempu ei, tabata tin lugá di parker den Kaya Industria, algu ku no tabata e kaso na e lokalidat di Playa.

Mas chikí

Aña pasá por a ripará ku e pakus di buki a bai di 2 unidat, pa 1 solo unidat i a bira mas chikitu. Sinembargo, esaki tampoko no por a yuda mas i awor e kompania ta bai sera por kompletu. E echo ku aña pasá e pakus Bruna a habri, ku pa gran parti tabata bende meskos ku Addo’s, pero ku mas surtido, no a yuda e situashon.

“Mi ta hopi gradesido na tur nos klientenan den transkurso di aña. Tambe nos a hasi hopi kos bunita den e añanan ei, manera presentashon di vários buki ku tabata tin un relashon ku Boneiru”, asina Stuur a bisa.