KRALENDIJK – Aeropuerto Internashonal di Boneiru (BIA) lo modernisá e kòntròl di seguridat pa pashero den transkurso di e aña aki. Djamars a firma un kontrato ku e empresa hulandes Dael B.V., ku lo suministrá i instalá ekiponan di skrin i skèn nobo i modèrno.
Ku e invershon aki, Aeropuerto Flamingo lo mehorá e seguridat i hasi e proseso di kòntròl pa pashero mas rápido i ménos molestoso. Tambe lo amplia e área di espera na e gatenan, algo importante pa buelonan pa Merka.
E ekiponan di seguridat nobo aki ta kumpli ku e normanan di seguridat mas estrikto di Hulanda i Merka. Danki na esaki, pashero ku ta biaha pa Merka lo no mester pasa un kòntròl adishonal na e gate. Esaki lo skapa tempu i lo hasi e proseso mas kómodo pa e pasahero.
E adkishon di e sistema nobo aki a bira ta posibel dor di un supsidio di Ministerio di Hustisia i Seguridat.
Urgente
Segun e direktor di BIA, Maarten van der Scheer, e modernisashon ta urgente: “Ku esaki nos ta mehorá e seguridat, garantisá un fluho di pasahero mas rápido i un mihó eksperensia. Danki na e ayudo di ministerio, awor nos por dal e stapnan nesesario.”
Dael B.V. lo suministrá e mashinan di skrin di último generashon i skèner pa persona. E empresa PointFWD B.V. a guia BIA den e preparashon di e proyekto.