ORANJESTAD- E siman benidero, entre 6 pa 11 di òktober 2022, ta tuma lugá na Aruba e prome konferensia di aviashon organisá pa Dutch Caribbean Cooperation of Airports (DCCA). 

“Nos ta kontentu di yama tantu personanan lokal i internashonal di e islanan di Hulanda Karibense, Hulanda i e region di Amerika (Latino) bonbiní pa komparti konosementu i krea diálogo riba futuro di aviashon i tambe konekshon entre e islanan di Hulanda Karibense. Nos ta sinti nos honrá di por ta anfitrion di e evento aki na Aruba, anto ta mas orguyoso ainda di tin e promé buelonan eléktriko den Karibe ku e Pipistrel Velis Electro, ku lo realisá durante e siman ei”, Joost Meijs, CEO di Aruba Airport Authority N.V., ta deklará den su funshon komo Presidente di DCCA.

Dutch Caribbean Cooperation of Airports (DCCA) ta un koperashon entre tur seis aeropuertonan di Karibe dentro di Reino Hulandes. E ophetivo di DCCA ta pa mehorá e kalidat general di kada aeropuerto individual dunando asistensia mutuo i interkambio efisiente di informashon, traspaso di konosementu i kompartiendo eksperensia ku e meta pa logra ekonomia di eskala.  DCCA ta aspirá pa presentá opshonnan pa transporte aéreo alternativo ku mira riba futuro  entre e islanan di Hulanda Karibense i ta organisá na Aruba di 7 te ku 11 di novèmber 2022 e Promé  Transporte Aéreo Internashonal Duradero, yamá  ‘A Flight to the Future’.

Aktividatnan

Durante henter e siman di e kongreso lo tene charla- i presentashonnan, lo tin debate, lo duna masterclass  i lo tin tur dia demostrashon na aeropuerto di Aruba di e buelonan eléktriko ku lo efektuá  ku e Pipistrel Velis Electro. E Pipistrel Velis Electro ta e promé avion eléktriko sertifiká na mundu.

Partisipantenan na e evento ‘A Flight to the Future” ta konsistí di interesadonan lokal i internashonal dentro di industria aéreo i turístiko di e islanan di Hulanda Karibense i e region mas ámplio di Amerika Latino i e region di Karibe, ku di un òf otro manera lo influensiá biahamentu entre e islanan den futuro (serkano) positivamente.