Akshon konhuntu mester kondusí na un Boneiru muchu mas limpi

KRALENDIJK – Un akshon konhuntu ku ta inkluí Selibon, Entidat Publiko Boneiru (OLB) i Fundashon Bonaire Limpi i Bunita tin komo meta haña isla mas limpi ku ta e kaso awor aki. Informashon tokante e inisitativa a wòrdu duná djaluna mainta durante un konferensia di prensa. 

Kaminda ku Boneiru antes tabata tin e renombre di ta e isla mas limpi di hinter anterior Antia Hulandes, esaki ya pa basta temput no ta e kaso mas. Tin hopi tiramentu di shushi ilegal den mondi, i hopi hende ta basta rabiá pa e aktitut aki. 

E akshon komun lo mester yega na un isla ku ta muchu mas limpi atrobe. Entre otro lo organisá un Dia di Limpiesa di Bonaire, lo bira gratis pa algun siman pa hende drenta den na lèntfil i Selibon lo organisá akshonnan di limpiesa den bario. 

Sosten

Aparte di esaki, ta intension di Selibon pa sostené aktividatnan di otr gruponan mas aktivamente. “Nos ta pidi tur organisashon ku tin plan pa organisá un akshon di limpiesa den nan bario òf ku ta desea di partisipá den e kampaña aki pa tuma kontakto ku nos via e-mail adres afvalbeheer@selibon.com, asina nos por yudabo òf kontribuí na e inisiativanan aki,” asina e kompania di maneho di awaseru a bisa.