KRALENDIJK- Resientemente a start un kampaña nobo pa kita un kantidat basta grandi di vehíkulonan bieu i hopi biaha bandoná for di den bario.

Aktualmente tin un akshon ta tumando lugá den bario di Tera Korá. Promé ta pone sticker riba e outo, kaminda e doño por kita esei for di kaminda públiko te un sierto fecha. Despues di esaki Selibon ta bin piki e outo pa destruí esaki. 

Ilegal

Boneiru ta konosé hopi garashi semi-legal i asta ilegal. Ora no por drecha sierto outo mas, esaki ta keda para kaminda ku e ta. Asina’ki tin varios santana di auto basta grandi ku a krese den transkurso di tempu. No solamente ta un mahos bista, pero e por ta dañiño pa medio ambiente i tambe hopi biaha ta duna sangura e oportunidat pa brui den awa ku ta keda para den e vehíkulonan bieu aki.