KRALENDIJK – Un intervenshon hopi rudo, pa no bisa violento, kontra e periodista lokal Tico Janga pa un agente di Korps Polis Karibe Hulandes (KPCN) a kousa reakshonnan di shòk i indignashon na Boneiru.

E akshonnan di e ofisial, ku inklui un pushá hopi fuerte i dirpiente ku ta pone Janga kai atras riba e tròtwar, a keda kapturá pa diferente telefon selular i wòrdu rápidamente kompartí riba medianan sosial.

Aunke ku e konteksto di e situashon no ta evidente for di e fragmento kòrtiku di bideo, ta parse ku Janga na momentu dado a wòrdu arestá tambe pa e ofisialnan.

Hopinan riba media sosial ta ekspresa shòk riba e akshon di e polis. “Asina no!” ta rekashon di un person riba feisbuk. “Kiko tabata den kabei di e ofisial aki?” ta otro pregunta ku por mira. Tambe ta nota ku niun di e agentenan den e grupo di polis ta intervení. Ademas, ningun di e polisnan ta parse di preokupá nan mes ku e bienestar di Janga. Janga por poko a kai ku su kabes kontra un di e pilá chikitu ku tin riba e tròtwar.

Investigashon

Bosero di KPCN ta reakshoná di forma neutral riba preguntanan di ABC Online Media ora a pidi un reakshon di parti di KPCN. “E prosedura ta standard. Ta bai inisia un investigashon over di e uso di forsa (geweld), esaki ta standard ora un agente hasi uso di forsa (esaki tambe ta inkluí uso di nan armanan) i esaki ta wordu investiga dor di ministerio públiko. Banda di esaki, mnr Janga ta den su derecho di  entrega keho na polis. Esaki por ta den forma di un “klacht” i un “aangifte”, segun e bosero di polis.