KRALENDIJK- Alwyn Braaf, djabièrnè mainta a keda instalá komo hefe nobo di Korps Politie Caribisch Nederland (KPCN). 

Diferente hefe di kuerponan polisial tabata na Boneiru pa e okashon spesial. A inisiá e proseso, kaminda un grupo di polisnan a marcha i despues a hisa diferente bandera entre otro esun di Boneiru ku nan himno.

Diferentente hende a papia durante e seremonia, entre otro gezaghèber Edison Rijna. Rijna a konta ku e tambe a forma parti di e komishon di selekshon ku a skohe Braaf i ku e ta sinti su mes orguyoso di e eskoho ku hasi. Rijna a deseá Braaf ékito den su funshon nobo. 

Braaf mes a konta ku e ta kòrda e dia den aña 1995 ora su tata a bahele na e skol di polis na Rio Canario na Kòrsou. “Mi tabatin 18 aña yen di ánimo pa bai skol pa bira polis. 1997 mi a yega Boneiru. Ibi Statie tabata mi promé mentor, aki na Boneiru. Mi a pasa diferente funshon den kuerpo durante e 25 aña, te ku mi a yega na e momentu aki, awe”. 

Dinámiko 

Braaf a bisa ku e ta konsiderá e ekipo ku di KPCN, manera e ta awor aki, un ekipo hopi dinámiko. Despues di e seremonia di inougurashon tabata tin hopi felisitashon pa Braaf. Diferente hende a saka potret ku e hefe nobo di Kuerpo Polisial.