KRALENDIJK – Despues di un temporada di prueba awor por hasi uso ofisial di e ambulift nobo di Bonaire International Airport (BIA) pa hiba pasaheronan ku tin difikultat ku kanamentu, mas mihó posibel na bordo. 

Ku esei aeropuerto huntu ku e kompanianan di aviashon i kompanianan ku ta despachá avionnan, por duna e grupo di pasahero akí un bon servisio atrobe. Por hasi uso di e vehíkulo akí pa tur avion mediano i grandi. 

E aerolíneanan i nan kompanianan di despacho ta ehekutá e proseso aki. BIA mes a tuma e initiativo pa kumpra un ambulift. Ya for di 2022 kaba a òrdu e ambulift, pero pa motibu ku e tempu di entrega di parti di e suministradó a dura largu, ta resientemente numa a entreg’é na Boneiru. Despues di amplio entrenamentu di e personal di BIA i di e kompanianan ku ta despachá avion, kon pa usa i mantené e left, i despues di instalashon di diferente aparato tékniko, a tuma e left awor den servisio. E left ta propiedat di BIA i ta ser usá pa e empleadonan di e kompanianan ku ta despachá avion. 

Sumamente kontentu

Airport Duty Manager Gregorio Matthew: “Nos ta sumamente kontentu ku awor ku e ambulift nobo tei, huntu ku e despachadónan, nos por duna un servisio mas mihó posibel na pasaheronan ku no por subi na bordo riba nan mes. Ademas e kompanianan di despacho ta yudá tambe ku e left nobo komo ku hasiendo uso di e left, nan kondishonnan di trabou ta drecha tambe.”