KRALENDIJK – Tourism Corporation Bonaire (TCB) ta bisa di ta kontentu pa por anunsiá un ampliashon di su skema di buelo for di Miami ku American Airlines (AA).

Den kolaborashon ku AA resientemente TCB a informá tokante e skema di verano binidero ku introdukshon di un di 4 buelo ida i buelta riba djabièrnè. Despues di e aktual eksitoso skema di wenter, AA ta konfirmá introdukshon di su di 5 buelo semanal pa Boneiru, kaminda for di luna di desèmber 2024 ta introdusí 2 buelo riba djasabra riba e ruta Miami – Boneiru.

E di dos buelo ta kuminsá for di 7 di desèmber 2024 AA. Un buelo ta sali for di Miami pa 10.05 pa yega Boneiru pa 14.26 ‘or, i e di dos buelo ta sali for di Miami pa 12.05 ‘or i yegada na Boneiru pa 16.26 ‘or.

Banda di esaki e buelonan di verano di AA ku resientemente a keda introdusí riba djabièrnè lo sigui forma parti di e skema di wenter, ku konektividat riba djaluna (1), djárason (1), djabièrnè (1) i djasabra (2). AA a konfirmá tambe un kambio den e tipo di avion pa Boneiru, ku introdukshon di e Boeing 737 riba e ruta Miami – Boneiru.

Kontentu
“Nos ta kontentu di por kontinuá ku nos kolaborashon ku American Airlines i ofresé konektividat mehorá ku Boneiru. E paso stratégiko akí no solamente ta fortifiká nos lasonan ku American Airlines, pero ta engrandesé tambe nos kapasidat pa atraé merkadonan sekundario na Merka,” asina Miles Mercera, direktor di TCB, a bisa.