AMSTERDAM – Riba un dia históriko, djaweps 15 di febrüari, a presentá un plan ambisioso  pa lanta e Museo Nashonal di Sklabitut riba Java-eiland na Amsterdam. E proposishon, ku kwartiermakernan John Leerdam, Peggy Brandon i David Brandwagt a desaroyá, ta marka un stap importante den rekonosé i eduká e pasado di sklabitut kolonial Hulandes. Munisipio Amsterdam i Reino ta okupá nan mes pronto ku e desishonnan definitivo pa loke ta trata e konstrukshon i finansiamentu di e proyekto krusial aki.

Java-eiland, ku nan a skohe pa su posishon prominente i bon aksesibilidat, lo akomodá segun espektativanan un edifisio markante di alrededor di 9.000 meter kuadrá den 2029 pa 2030. E edifisio no ta primintí di bira solamente un obra arkitektóniko maestral, pero tambe un sentro edukativo ku ta eksponé e historia kompliká di sklabitut.

Despues di un proseso di partisipashon ekstenso, kaminda diferente komunidat, organisashon i insitutonan di konosementu tabata enbolbí, ta opvio ku e museo lo ta mas ku solamente un kolekshon di artefakto. E lo ta un sitio kaminda lo konta storianan di forsa, rebeldia, opreshon i ekspreshonnan kultural atraves di siglonan, partí den diferente époka ku ta hiba e bishitante riba un biahe den tempu.

Despues di mas ku un aña i mei di investigashon i diálogo e kwartiermakernan a terminá nan proposishon, ku tin e título ‘Vertel het hele verhaal’. E plan aki no ta deskribí e biahe literalmente so, pero tambe figurativamente ku a kondusí na e momento aki. Awor ta kuminsá e proseso di tomo di desishon atministrativo kaminda ta bai buska konseho serka instanshanan relevante i finalmente presentá un desishon na konseho munisipal di Amsterdam.

Banda di konstrukshon di e museo mes, ta kuminsá wak di antemano e periodo pa e apertura ofisial. Ta sugerí un programa preparatorio ku ta kuminsá den 2024 kaba den e Museo di Rebeldia, ku e metanan pa sigui desaroyá e konsepto di e museo, krea e kolekshon i ámplia e fama i enbolbimentu den e museo benidero.

E Museo di Sklabitut Nashonal no ta primintí solamente di bira un sitio kaminda ta presentá historia di sklabitut na un manera digno, pero tambe un plataforma pa edukashon, diálogo i komunikashon. Ku binida di e museo aki Hulanda ta dal un stap importante den rekonosé su pasado kolonial i ta ofresé un espasio pa reflekshoná i siña.