AMSTERDAM – Den e periodo benidero e kordinadónan di e futuro Museo di Sklabitut ta organisá diferente enkuentro na Hulanda kaminda personanan por partisipá i pensa riba e sitio i e kontenido di e museo. Den Amsterdam ta tene kuater enkuentro.

Ta tene e enkuentronan di partisipashon den Zuidoost, Oost, West i den e sentro. Tambe e kordinadónan, ku ta traha e plannan pa e museo, ta bai papia ku personanan na Den Haag, Rotterdam, Groningen, Arnhem i Middelburg. Esei e konsehal di Amsterdam Touria Meliani di kultura ta laga sa den un karta na e konseho di munisipio.

Nuebe posibel sitio

Tin akseso públiko pa e enkuentronan i munisipio di Amsterdam ta anunsiá esei riba diferente kanal pa alkansá asina mas tantu hende posibel. 

E intenshon ta ku ta deliberá riba kua historia nan ke mira bèk den e museo i kon e museo por duna un kontribushon na identifikashon i rekonosementu di e pasado di sklabitut.

Tambe lo tene diferente seshon mas chikí den diferente komunidat. I otro posibilidat ta ku personanan lo por bai duna nan deseo- i opinionnan tokante e museo, e edifisio i e posibel sitio ònlain. 

E munisipio tin nuebe posibel sitio na bista. E edifisio mester tin alrededor di 6500 meter kuadrá di supervisie pa públiko i lo bini un parke rondó di e edifisio.

Karibe Hulandes i Sürnam

Dos di e tres kordinadónan a bishitá Karibe Hulandes i Sürnam luna pasá pa papia einan tambe ku diferente grupo riba e kontenido di e futuro museo.

E intenshon ta pa e kordinadónan bini pa fin di aña aki ku un konseho pa determiná e kontenido di e museo i kua ta e sitio adekuá. E edifisio mester ta kla segun e plan na 2028.