KRALENDIJK- Hopi ámtenar di Entidat Públiko Boneiru (EPB) a reakshoná ku asombro riba e notisia ku gezaghèber Edison Rijna ta bai haña un puesto nobo i lo no sigui komo gezaghèber di e isla. 

Loke no a kai den muchu bon tera serka sierto hende, ta e echo ku mester a lesa e notisia aki riba un wepsait di notisia hulandes, ku a sali promé ku e notisia aki.

Den transkurso di mainta a sali un komunikado pa prensa di parti di Rijksdienst Caribisch Nederland (RCN) ku e mesun informashon aki. Ta te den transkurso di djaluna anochi, e website di EPB mes a saka e notisia. 

Kustumber

Mester bisa si ku gezaghèber Rijna tin un kustumber di publiká kos den medionan di prensa hulandes, hopi biaha promé ku esnan lokal. Esei tabata e kaso ora Rijna a komuniká ku na su opinion Boneiru ta prostituyendo su mes ku e turismo aktual, pero tambe den kaso di e konstrukshon di Sunset Beach Park, ku a keda anunsiá tambe via di un wepsait di notisia Hulandes. Despues di protesta di prensa lokal, a kore saka un komunikado na Boneiru tambe.