ORANJESTAD – A base di sospecho di  korupshon Rishèrshi di Reino di Aruba a detené ayera Eumar Koolman i su partner. A arestá Eumar Koolman, anteriormente kordinadó bou di èks-minister Chris Romero, kaba na novèmber 2023. Ministerio Públiko ta konfirmá su di dos detenshon. Koolman ta enbolbí den e asina yamá kaso-Kwihi, kaminda tin sospecho di korupshon ku fondonan públiko.

E asuntu ta drei rondó di akuerdonan pa servisio, ku anterior minister Chris Romero a sera.  Tin e sospecho ku Koolman i otronan a risibí sèn na manera froudulento di Pais Aruba pa medio di e akuerdonan aki.

Ministerio Públiko ta investigá awor kon, aparentemente sistemátiko, a empleá ‘ámtenarnan fantasma’ ku de fakto no tabata presente òf no tabata traha, pero ku si tabata risibí salarionan haltu. Koolman lo tabatin un empresa ku tabatin e empleadonan aki, ku supuestamente tabata traha na e ministerio di anterior minister Chris Romero, den servisio. Ta pretendé ku asta un yu hòmber di un anterior minister di MEP tabata den servisio i ku den pasado a listra su kas tambe.

E situashon a sali na kla na momento ku Ursell Arends, aktual minister di Integridat, a deskubrí iregularidatnan na momento di tuma e ministerio di Romero. Komo reakshon el a entregá un keho ofisial. E keho ta sugerí ku e empresa di Koolman posiblemente tabata fungi komo un tipo di agensia di trabou temporal pa e ministerio, kamida e tabata responsabel pa tumamento den servisio i pago di e ‘ámtenarnan fatasma’ aki.

Ministerio Públiko no ta ekskluí ku mas detenshon lo sigui.