Notisia

Anterior reina di karnaval di Sint Maarten ta bringa pa su bida despues ku a  atak’é ku kuchú

PHILIPSBURG – Estika Halley ta lucha pa su bida despues ku djadumingu mainta un hòmber a hink’é vários biaha ku kuchú i seguidamente a purba di kòrta su garganta. Ta un milager ku e reina di karnaval di 25 aña a sobreviví e atake.

Halley ta den kuido intensivo den Sint Maarten Medisch Centrum i su situashon lo ta krítiko pero stabil.

E atentado  riba Halley su bida a tuma lugá riba tereno di parker di Emerald Funeral Home and Crematory na Cay Hill, skeins enfrente di entrada di hòspital. Kámaranan di e funeraria a kapta e atentado brutal.

No ta konosí kiko a sosodé promé ku e intento di asesinato i kiko e relashon ta entre e hòmber i e víktima. E hòmber a hui bai den e outo di e víktima i a haña e outo djadumingu mèrdia tur na sanger na parti Franses. 

E notisia a plama lihé riba medionan sosial, inkluso pòtrètnan di e supuesto sospechoso, un hòmber di 38 aña di Sint Maarten. Mas lat polis a informá ku e hòmber a entregá su mes na warda i a arest’é. Na 2016 a koroná Halley komo TelCell Senior Carnival Queen den Carnival Village. Resientemente el a regresá Sint Maarten, despues ku el a traha i biba na Hulanda. E trahadó den salòn di beyesa a kuminsá su propio nogoshi riba e isla. E ta mama di un yu muhé.                                               

Deel dit artikel
Rocargo
Rocargo
Rocargo
Rocargo