Apelashon pa dos hóben ku a trapa dos persona mata na Kaminda pa  bai Westpunt

WILLEMSTAD – E dos hóbennan di 19 i 24 aña, ku kada un mester a bai prizon 16 luna pa motibu di a okashoná un aksidente ku morto, a apelá. Esei e korant Èxtra ta informá.

E aksidente entre tres outo riba Kaminda pa bai Westpunt, banda di Wacawa na aña 2022, a kosta bida di e hòmber Venezolano di 35 aña Victor Alfonso Perez Carrillo i e señora Dominkana di  61 aña Marina Dipre Garcia. Ámbos tabata traha den un restorant na Playa Forti i tabata bayendo kas.

Segun investigashon di polis ámbos hóben tabata kore den nan propio pikòp ku velosidat te 147 kilometer pa ora, kaminda tabata pèrmití pa kore te 60 kilometer. Nan tabata pasa otro i otro outomobilistanan.

Segun wes e morto di e Venezolano Victor i e Dominikana Marina tabata kompletamente falta di e hóbennan. Nan tabata uza e kaya skur i sin iluminashon komo pista di kareda. Polis por a prueba esei pasobra e hóben di mas edat tabatin un dashcam den su outo.