WILLEMSTAD – Aqualectra ta sigui ku su operashon pa ekipá tur e kasi 33.000 palunan di lus di kaya ku iluminashon LED.  E parti di Schottegatweg West na pòst 5 te na rotònde di Palu Blanku ta e promé na turno awe.

Mañan e trahadónan di Aqualectra ta sigui ku e trabou for di rotònde di Palu Blanku den direkshon di Nijlweg te na e krusada ku Frater Radulphusweg.

Por último ta instalá djabièrnè e iluminahon LED na ámbos banda di Schottegatweg Zuid. Esei ta kuminsá na Emancipatie Boulevard te na e krusada di Schottegatweg Oost i Kaya Jombi Mensing.

E trabounan ta kuminsá tur dia di 8’or di mainta te 4’or di atardi. Komo ku un parti di e iluminashon di kaya ta mei mei di e kamindanan, e tráfiko lo por sinti molester di e trabounan aki.

Por kontrolá e iluminashon LED aki for di distansia i tambe Aqualectra por mira mésora unda un lampi no ta funshoná òf unda tin un interupshon. Na tur e kompania di energia por instalá 10.000 palu di lus  pa aña ku iluminashon LED. Esaki ta e promé aña ku a kuminsá ku e operashon pa kambia e lusnan.