Kralendijk- Ta prolongá e areglo di emergensia pa gastu di salario i sosten di entrada for di Ministerio di Asuntunan Sosial i Empleo di 13 di yüli te ku 12 di òktober 2021. Ounke turismo ta re-inisiando i merkado laboral ta rekuperando, ainda e ta un periodo insigur pa empresanan. Pa promové inisio, a ahustá e areglo riba algun punto.

A establesé e areglo di emergensia di SZW na mart 2020 pa yuda dunadónan di trabou na Hulanda Karibense ku gastu di salario di empleadonan ku no por a mantené na trabou debí na e krísis di corona. Den e fase di prolongashon, empleadonan ku ta kai bou di e areglo di emergensia por ehersé nan trabou. Esaki ta duna dunadónan di trabou espasio pa hasi negoshi, miéntras nan ta sigui risibí sosten pa paga salario.

Kambio

Den e periodo di prolongashon, ta redusí e sosten di 80% pa 60% di e salario. No por registrá empleado nobo pa e prolongashon. E sosten ta kontinuá pa empleadonan ku riba e fecha di referensia 24 di yüni 2021 ta kai bou di e areglo di emergensia kaba. Ta mantené e kondishon vigente di pèrdida di entrada di mínimalmente 20%, pa asina e supsidio yega na e empresanan ku realmente mester di sosten.

Dunadónan di trabou mester avisá si nan no ta kumpli mas ku e kondishon aki, òf si nan no a mantené empleadonan pa ken nan ta risibí sosten, na trabou. Si e informashon ku a duna anteriormente ainda ta korekto, no ta rekerí ningun akshon pa bini na remarke pa e periodo di prolongashon.

Dor di relahá di un banda, i baha e porsentahe di e otro banda, ta krea un balansa ku ta resultá mas atraktivo pa empresanan por inisiá (kompletamente) atrobe. E detayenan di e prolongashon aki ta resultado di kombersashon ku representante lokal di e komunidat empresarial.

Otro gruponan

Pa empresario independiente i èks empleado, e areglo di emergensia ta prolongá sin kambio te ku 12 di òktober 2021. Mester komuniká kambio di situashon semper. Por ehèmpel, si un persona kuminsá haña (mas) entrada atrobe, òf si e bandoná Hulanda Karibense. Empresario independiente i èks empleado por entregá aplikashon nobo durante di e periodo di prolongashon. Mirando ku e situashon na Hulanda Karibense ta bai den bon direkshon, hasi un aplikashon nobo no ta opvio.

Pa mas informashon i pa e formularionan nesesario, tira un bista riba https://papiamentu.rijksdienstcn.com/covid-19 bou di ‘Pakete di emergensia di Gobièrnu’. Empresarionan di Boneiru por aserká Kámara di Komèrsio tambe pa pregunta i konseho via [email protected].