Arte di Palabra Boneiru ta gradisí

Kralendijk – Delegashon di Arte di Palabra di Boneiru ta gradisí tur pa e sosten risibí di primeramente mayor i famia di e partisipantenan, fanátikonan i tur ku a biba ku e aktividat aki desde komienso te final. Tambe ta gradisí e komishon organisadó di Aruba bou di guia di Julie Merencia i Ange Marie Jessurun (tante Ange) pa a inisiá ku e proyekto aki na aña 2000. Nos partisipantenan di Boneiru a representá Boneiru dignamente na Aruba.

Djárason 28 yüli 2021 na final di atardi a tuma lugá e kompetensia di Arte di Palabra ABC 2021 na Aruba den sala di Cas di Cultura. Tabatin 32 obra presentá pa diferente hóben di Aruba, Boneiru i Kòrsou. Boneiru a partisipá ku diesun obra presentá dor di ocho partisipante i Boneiru tabatin representashon den tur kategoria.

E partisipantenan tabata Ramso Coffie, Lygaira Pieters, Jeaniro Dorothea, Maria-Luisa Troncon, Juriella Josephia, Irlenska Martinus, Akeesha Cicilia i Radinka Alberto. Partisipantenan tabata bou di guia literario di Jonathan de Wind. E delegashon di Bonaire enkabesá pa Sekshon di Kultura, Arte i Literatura (SKAL) tabata konsistí di Sulainie Martis, Seferina Saragoza, Lyndon Leito, Juliette Clarenda, Christopher Frans i Urvin Sint Jago.

Premio

Pa loke ta trata premiashon, tabatin 21 premio. Boneiru a konkista 10 premio i sobra a bai repartí pa Aruba i Kòrsou. E aña aki tambe tabatin un ganador apsoluto (premio general) i esei a bai pa Rafael Garcia di Aruba. Remarkabel ta ku Boneiru a posishoná su mes na promé lugá den kuater di e seis kategorianan. Den e kategoria di poesia original e partisipantenan di Boneiru a piki tur premio.