Kralendijk- Segun Arthur Sealy, e mihó kos ku Bonaire por hasi, ta usa ekspreshonnan di e minister na su benefisio.  Minister Ollongren, den e siman ku a pasa a bisa ku Bonerianonan lo meser baña ménos òf mas kòrtiku, usa èrko ménos i kuminsá usa mas pero di LED. Tur esaki pa spar energia. 

“Hulanda ta den diskushon ku kambio di klima i ku mester invertí miar pa trese kambio promé ku 2030. Dikon no por supsidiá Bonaire ku sinkuenta mion si no ta mas” asina Sealy a trese padilanti. 

Segun Sealy ta sigui mustra, WEB pa basta aña ta tratando pa hala nos atenshon pa bai uso di awa i koriente. “Nos ta tende i sigui e konsehonan”? Sealy ta sigui bisa ku nos mester wak den spil, promé ku manda minister bai su orígen. 

“Mundu tin un problema di kambio di klima. Mundu ta bira mas kayente i nivel di laman ta subi. Ta bini mas mal tempu, tempestat, orkan i ola mas altu. DCNA ya tin kritiká ku nada ta sosodé riba e problemátiko aki.. Suponé bini un orkan i afektá WEB. Bonaire ta keda sin awa sin koriente. Nos ta kore bai Hulanda lubidá kon nos a zundra Ollongren e tempu aya”? 

Serio

Pesei, segun Sealy, nos mester bira serio i traha riba seguridat, kontinuidat i energia duradero. “Laga nos kuminsá bira moderno i usa konosementu di teknologia moderno. Awor mester mustra Hulanda enbèrdat ku e plan di invershon den kompania WEB tin prioridat”. 

Sealy ta mustra riba un aspekto importante, anto esei ta ku WEB lo no por keda kant’i laman. “A bira tempu pa Bonaire tin un “Kralendijk Denk Groep” sin asginatura polítiko i independiente ku nos sientífikonan: manera: Jopi Giskus, Gunther Flanegin, Roy Martina, Edsel Winklaar, Hubert de Palm, Giovany Frans, Karel Visser, Gino Obersi, Chris Frans, Vurnon Cicilia, Anthony Cicilia, Michael Blom í  Alfredo Koolman pa yuda traha un plan pa na 2030 Bonaire ta mihó prepará. Laga nos kuminsá duna balor na nos hendenan ku nan ret internashonal riba nan tereno”, asina Sealy a konkluí.