Kralendijk- Arthur Sealy a reakshoná di forma furioso riba plan di Konseho Ehekutivo pa gasta 44.000 dòler riba un plan pa graba un vershon nobo di e himno boneriano i trahamentu di un dokumental tokante esaki.

“E vírus di Corona ta keda Bonaire i nunka mas nos lo bai tin un normal nobo. Ta un episodio nobo Bonaire a drenta. Pa tene e kontagio abou tin ku kambia nos manera di anda ku otro. Bakuná, enfoká riba e parti di higiena, establesimentunan por eksigí tapa boka i mantenshon di distansia.E situashon ku nos ta den ta un krísis. E normal ku nos a konosé a pasa pa istoria. E krísis nobo mester ta un komienso total nobo unda tin ku bini ku ideanan nobo”, asina Sealy ta kuminsá.

“Si ta pronostiká ku na 2030 Bonaire su poblashon ta riba 27.000, anto mester puntra ki konosementu i abilidat nos ke pa nos alumnonan tin den 2030. For di awe nos ta obligá pa kuminsá trese kambio den sentido di inovashon. Awor nos mester yega na kreashon ku e konsekuensia ku ta eliminá funshonnan ku no ta aportá na kambio i progreso, manera: CEO, mènedjer di programa, di proyekto, di kambio, HR, chef de bureau, Pr, konsehero finansiero, konsehero di portofolio, shèf di gabinete di gezaghèber, konsùltent, asistente den klas, lider di tim i mas di e funshonnan inútil ku ta kosta plaka”, segun Sealy ta skibi.

Bagamunderia

“Un ehèmpel kon no mester usa plaka i sigui ku ideanan bieu ta e idea desastroso di hinka kasi kuarenta i kuater mil dòler den renobá himno di Bonaire i un dokumental. Ta nifiká pa luna un suma di 3650 dòler bentá afó. Kuantu hende ta bai gana e suma aki?”, asina Sealy ta puntra.

Sealy ta bisa di ta hasi un yamada na diputado i Kolegio Ehekutivo pa deshasí di loke e ta yama “e bagamunderia aki”. “E himno ta mashá bon i no tin nodi di ningun dokumental. E proyekto aki no ta útil i no tin ningun balor pa desaroyo di Bonaire. E kos aki ta mal gobernashon. Hinka e plaka den piskadónan, kunukeronan ku sí ta na bienestar di pueblo”, asina Sealy ta klousurá.