WILLEMSTAD – Nashonnan Uní a desaroyá un plan pa inisiá un sistema di fèri den e área di Karibe. Den e plan ta papia di kuater ruta, entre kua un ruta Aruba, Boneiru i Kòrsou. 

Un otro ruta mester konektá Sürnam i Guyana via un fèri ku Trinidad i Tobago, ku ta e nudo mas importante den e sistema aki.

Den e próksimo tempu ta bai hiba konsulta ku e paisnan embolbí pa sondea nan disponibilidat pa partisipá, e sitio Hulandes pa notisia marítimo, Schuttevaer, ta informá.

E Komishon Ekonómiko pa Amerika Latino i e área Karibense pa Nashonnan Uní a skirbi e proposishon pa e  proyekto.

Segun Schuttevaer e plannan no ta nobo, i ta papiando desenio largu kaba di konekshonnan ku fèri ku lo mester resultá mas barata i sigur mas limpi ku e aeroliñanan usual. Ademas e servisio di fèri mester stimulá nogoshi entre e paisnan.

Pero pasobra e área ta ámplio i akompañá pa su komplehidat ta motibu ku niun hende a tribi di bini ku un proposishon konkreto. Esei t’ei awor si.

Sürnam

E ruta ku ta inkluí Sürnam, ta identifiká komo esun mas viabel di e kuater rutanan, pasobra e tin e mihó márgen di ganashi pa e servisio. Segun estudionan lo mester tin un barku pa un frekuensia di dos salida.

Banda di esei tin un preferensia pa implementá un fèri rápido, ku por transportá entre otro vehíkulonan ku produktonan agrario fresku. Esei lo promové e nogoshi entre e paisnan.

Tin hopi trabou pa hasi ainda, promé ku e konekshonnan di fèri ku a proponé por ta operashonal, Schuttevaer ta bisa. Paisnan ku ke ta parti di e ret di konekshon mester pèrkurá pa fasilidatnan di haf adekuá.

Hopi ta dependé di e kapasidat disponibel di e haf. Mester atendé esei pa pèrkurá ku e tempu ku e barkunan mester keda den haf ta mas kòrtiku posibel pa un rendimentu  operashonal mihó. Tambe mester revisá e reglanan di duana i imigrashon pa persona i merkansia.