Aruba ta pèrdè den un siman di tempu dos pianista di kaliber

ORANJESTAD – Aruba ta rou pa pèrdida di dos pianista den un siman di tempu. Djaweps Albert Croes a muri na edat di 61 aña. Un dia despues Eddy Samson (72) ta fayesé.

Segun e sitio di notisia NoticiaCla e dos personanan aki ta laga un herensia musikal imponente atras riba e isla. Albert Croes tabata un pianista hopi gustá na hopi evento i tabata duna lès di piano tambe na un generashon nobo di pianista riba e isla. Eddy Samson tabata prinsipalmente konosí pa su tokamentu virtuoso durante eventonan di djès.