ORANJESTAD – Aruba ta bai kuminsá tòg ku eliminashon di 12.6 porshento redukshon riba salario di ámtenarnan i sobrá personal di gobièrnu. Ku e desishon aki Promé Minister Evelyn Wever Croes ta bai kontra di palabrashonnan ku Hulanda.

E luna aki ámtenarnan ta kuminsá haña sinku porshento bèk di e 12.6 porshento ku segun palabrashon ku Hulanda mester a retené debí na sosten di korona.

E Promé Minister a biaha speshal pa Hulanda pa konvensé e sekretario di estado ku Aruba ta kumpli ku tur kondishon pa terminá paulatinamente e redukshon di salario.

Segun Konseho di Minister di Reino esei no ta e kaso. E punto mas prinsipal ku ta habrí ainda ta e normalisashon di salarionan haltu na kompanianan anónimo di gobièrnu. Pasobra Aruba no a yena e kondishon ei bon, Den Haag no ta bai di akuerdo ku pago di sinku porshento bèk.

Den un reakshon e sekretario di estado ta bisa ku e no ke añadi nada di loke Konseho di Minister di Reino a bisa na final i konsekuentemente ta keda mantené e eksigensia pa atendé ku e salarionan haltu di e kompanianan  di gobièrnu.

Si kuminsá tòg ku e pago bèk un otro konsekuensia ta ku Aruba lo no por hasi apelashon mas riba un estado di eksepshon, kaminda temporalmente e no mester kumpli ku e normanan di presupuesto.