WILLEMSTAD – Ya pa nuebe aña  despues di e fecha polis ta buskando e hòmber, ku un dia despues di asesinato di Helmin Wiels, ta tira e doño Chines di toko Hua Jiant mata banda di misa di Janwé. Ta trata di Guincley Emanuel Poppen ku awor tin 27 aña. Su último paradero tabata na Sint Maarten, pero polis ta kere ku mientrastantu e lo ta na Hulanda i kisas ku un otro identidat.

Riba 9 di mei 2013 Quicley i su kómplise – ku entretantu si nan a arestá – ta atraká doñonan di e minimarket Chines ‘Hua Jiant’ na Caracasbaaiweg. Nan ta tira e doño di 42 aña mata dilanti di su kasá. E botin tabata algun plaka largá i un par di karchi di telefon.

Hopi lihé despues di e atrako polis di Kòrsou ta publiká imahen di kámara di seguridat. I asina diferente persona entre kual miembronan di famia a rekonosé e hòmber ku e pèchi kòrá ku a tira.

Promé ku nan por a deten’é Quincley ta hui bai Sint Maarten. Despues e tabatin un biaha mas kontakto telefóniko ku su famia for di e islanan Saint Kitts i Nevis, pero for di e momentu ei no tin niun pista mas.

Den e programa di televishon Hulandes Opsporing Verzocht a dediká atenshon na e atrako. A pone Poppen riba e lista nashonal di esnan mas buská. Tin un rekompensa di djes mil florin pa e tep ku por kondusí na solushon di e kaso.