E asosiashon di Fondonan di Penshun na e islanan di Karibe Hulandes (CaPas) ta bini ku vários kurso atrobe pa hendenan ku ta trahando na fondonan di penshun, pero tambe kompanianan di seguro. 

“Nos kurso pa futuro miembro di direktiva di fondonan di penshun a kuminsá siman pasá. Nos ta organisá e kurso aki huntu ku e ekspertonan di WillisTowersWatson (WTW). Un echo ku nos ta basta orguyoso di dje”, asina CaPas ta skibi riba su página di LinkedIn. 

Tin mas kurso nan kaminda sin embargo. Den april tin un kurso ta start, huntu ku e instituto hulandes SPO tokante sistemanan di penshun kolektivo. 

Segun CaPas ta trata aki di un kurso pa tur hende ku ta traha na un fondo di penshun òf un kompania di seguro i ku tin di haber ku e materia di penshun. 

Traha huntu

E asosiashon a wòrdu lantá pa huntu sali na defensa di interesnan di e fondonan di penshun lokal. E organisashon di kurso, huntu, pa tur hende ku tin di haber ku penshun tambe ta un mira importante. E kursonan di CaPas no tin mira di hasi ganashi.