Atrobe 17 prosès ferbal pa diferente violashonnan den tráfiko

Kralendijk- Entre djaluna 3 i djárason 5 di mei, durante di kòntròlnan di tráfiko rutinario na diferente sitio, a duna mas i mas shofùr but  dor ku nan tabata kore sin dokumentu di seguro bálido, sin reibeweis bálido, pa manehá den direkshon prohibí, pa kore sin plachi di number  i pa uzo di telefòn bou di stür. Partikularmente pa manehá sin faha di seguridat bisti mayoria biaha a duna but.

A duna un total di 17 prosès ferbal. A duna prosès ferbal pa e siguiente violashonnan:

7x manehá sin faha di seguridat bisti

2x manehá sin plachi di number

1x manehá sin seguro

1x manehá sin reibeweis

2x uzo di telefòn bou di stür

4x manehá den direkshon prohibí

KPCN ta hasi un yamada na automobilistanan pa bistin nan faha di seguridat. Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda herida seriamente ora bo tin bo faha bistí.

Dokumentu

KPCN ta hala atenshon tambe di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai sigui ku kòntròlnan den tráfiko.