Atrobe detenshon den kaso di asesinato di Boechi

WILLEMSTAD – E Tim di kombatí Kriminalidat di polis den koperashon ku RST a bolbe arestá dos hende den e kaso di asesinato di Ruchendell Windster mihó konosí komo Boechi. E sospechosonan ta un hòmber di 44 aña i un muhé di 38 aña i ámbos a nasé na Kòrsou.

Ta sospechá nan di komplisidat den e kaso aki. Riba órden di Ministerio Públiko a tene un entrada na e adrès den Kaya Aura Winkel, kaminda polis a haña un arma di kandela i un kaha ku bala, ku posiblemente a uza durante e asesinato. Tambe polis a konfiská otro material di prueba importante ku por ta relevante pa e investigashon.

E asesinato di Boechi a tuma lugá riba e anochi di 9 di dezèmber 2022 na un trùk’i pan riba Rooseveltweg, kaminda a kita bida di e konosido rèpdo na un manera kruel.

Anteriormente a detené kaba Churendy C. (44) i despues Chris Z. (24). Mientrastantu a tuma lugá un direkshon di esena, kaminda ámbos a atmití di ta embolbí den e asesinato. Ministerio Públiko ta akusá nan tambe di esei. E kaso ta sigui riba 27 di oktober.