KRALENDIJK – Un Airbus A330 di KLM ku un koló diferente for di normal a hala atenshon di vários hende na  Aeropuerto Flamingo di Boneiru djabièrnè anochi.

Por a mira e Airbus ku a realisá e buelo KL765/767 ku un nanishi completamente blanku. Den e kaso aki, ta trata di e asina yamá “radome,” ku ainda no a ser pintá den e koló blou habitual di KLM. Radome ta un kontrakshon di palabranan “radar” i “dome.”

Daño

Remplaso di e radome por ta nesesario ku esaki daña, pòr ehèmpel dor di hagel òf un dalmentu di para den e parti di e avion aki. Tras di e radome di un avion, ku tambe ta kontribuí na e forma aerodinámiko, tin aparatonan di navigashon importante wardá.