KRALENDIJK- Aunke ku na promé instansia ta helikòper di Wardakosta a kuminsá ku e búskeda di e dos piskadónan pèrdi, finalmente ta avión Dash-8 di Wardakosta a bin enkontrá e dos hòmbernan riba laman grandi. 

“Despues di e notifikashon di parti di Polis, mes ora a manda e helikòpter di Wardakosta Boneiru pa ehersé un búskeda. E tripulashon di e helikòpter durante nan búskeda no a opservá e boto ku e hòmbernan na bordo riba laman”, asina Wardakosta ta skibi den un komunikado emití djarason mainta. 

E avion patruyero di Wardakosta den oranan di mainta a tuma e akshon di búskeda over di e helikòpter, i a buska rigorosamente den henter e área. Durante oranan di mèrdia e tripulashon di e Dash por fin a mira e boto den serkania di e parti Nortost di Boneiru. 

E Sentro di Reskate i Kordinashon di Wardakosta despues di a enkontrá e boto ku e piskadónan, mes ora a dirigí tantu e helikòpter komo un boto patruyero Metal Shark na e lokalidat pa wak kon e situashon ta. Na yegada a resultá ku e piskadónan tabatin problema ku motor i tabata drif riba laman. 

Awa

Ámbos hòmber tabata den bon kondishon di salú i no tabata falta nada. E tripulashon di e helikòpter a suministrá awa na e hòmbernan pa bebe i a keda den serkania di e boto te na momentu ku e boto patruyero di Wardakosta a yega. 

Na yegada di e Metal Shark nan a tou e boto i a tou esaki i tres’é sano i salvo bèk Boneiru.