Evento i farándula

Awe ta Dia Mundial di Krus Kòrá

KRALENDIJK – Riba 8 di luna Mei ta selebrá dia mundial di Krus Kòrá na honor di e fundadó di e movementu internashonal di Krus Kòrá kual ta persona di Jean-Henri Dunant ku a nase riba e fecha aki na aña 1828 na Suisa. Mundialmente Krus Kòrà ta para ketu riba e fecha memorabel aki pa e trabounan desplegá mundialmentu pa kada un di su miembronan i mas ahinda keda plantia e nesesidat pa sigui krea medionan pa protehá bida den nos komunidatnan i rekòrda hende kontinuamente di e importasia pa protehá dignidat di viktimanan di kualke konflikto armá i tur kousa di violensia.

Riba e dia aki tambe nos ta para ketu na nos prinsipionan fundamental pa nos keda mantene i respetá esakinan tur momentu i den tur situashon ku presentá. E 7 prinsipionan fundamental di Krus Kòrá ta: imparsialidat; humanidat; independensia; neutralidat; boluntarismo; universidat i unidat. Pues dia mundial di Krus Kòrá ta un dia internashonal ku ta dediká na aliviashon di sifrimentu humano, alsamentu di dignidat humano, protehá bida i tambe prevení situashonnan di emergensia i disaster natural.

Den e luna di mei aki nos di Krus Kòrá Boneiru kier pone infasis pa motiva i enkurashá kada suidadano Boneriano pa enbolbí nan mes mas den aktividatnan ku ta trata di salba bida. Nos ta kombensí ku tin hopi suidadano aki na Boneiru ku tin kurason pa komunidat i ta dispuesto ku ta saka man i yuda un ruman den nesesídat emergente, pero tin ku bisa ainda tin espasio pa mas yudansa. Pesei nos lo bishitá varios medio di komunikashon e luna aki hibando e mesahé. 

Nos a habri e luna di mei aki poniendo un krans na e monument di nos heruenan ku a pèrde nan bida durante di segundo guera mundial. Tristu ta ku ainda humanidat ta eksperensiá konfliktonan armá i violensia ekstremo, pesei nos di Krus Kòrá Boneiru kier yuda krea konsiensia pa algu asina no tuma lugá nunka mas. Lo klousura e luna aki ku un dia habri pa komunidat eksponiendo nos materialnan i hasi demostráshon di trabounan ku nos miembronan ta desplegá regularmente. Di e forma aki nos kier duna inisio na e temporada di orkan, pa nos ta bon prepará. Mas informashon di e dia habri aki lo kontinuá.

Kon abo tambe por kontrubuí o aportá na e kousa aki? 

Bira un boluntario i miembro di Krus Kòrá Boneiru. Nos komunidat ta kresiendo i asina nos organisashon tambe tin ku sigui krese atrabes di su miembro i boluntarionan. Tambe bo por kontribuí den forma di donashon. Nos organisashon ta brinda kada suidadano o organisashon e oportunidat pa forma parti di e organisashon humanitario di boluntario di mas grandi di mundu. 

Direktiva di Krus Kòrá Boneiru ta a gradisí tur su miembronan i boluntarionan i tambe tur esnan ku a bai nos dilanti pa nan aporte i kontribushon balioso na kousa aki i alabes yama un i tur PABIEN.

Si bo ta interesá pa haña mas informashon i pa despues kontribuí o aportá ku Krus Kòrá Boneiru komuniká ku nos via Whatsapp na e number +599 700.7001 òf +599 700.7002 tambe na email adres operations@redcross-bonaire.org

Krus Kòrá Boneiru ta konta ku bo.

Deel dit artikel
Rocargo
Rocargo
Rocargo
Rocargo